GIHINGUSGAN sa kapulisan sa GenSan nga dili huyang ang ilang pagpatuman sa health protocols batok Covid-19. Matud ni PCol. Gilberto Tuzon, director sa GenSan City Police Office (GSCPO) 24/7 nagbantay sa checkpoints ang iyang mga sakop. Gawas kanila duna usab mga personahe gikan sa Joint Task Force GenSan (JTFG) nga nagbantay partikular na sa mga borders.
Mapatuod niini ang gatusan sa ilang dinakpan matag adlaw nga misupak sa nagkadaiyang ordinansa, balaud sa trapiko. Lakip ang wala nagsuot og face mask, face shield ug misupak sa physical distancing ug mass gathering.
Dugang ni Tuzon, gawas sa mga land checkpoints hugot usab nila gibantayan ang kadagatan kauban ang Task Force Bantay Dalampasigan batok Covid-19 Delta variant.
Nanawagan si Tuzon sa publiko nga hugot mosunod sa mga protocols aron dili na madungagan ang gatusan nga aktibong kaso sa virus sa dakbayan. ( Richel Gubalani)
