Temporaryo karun nga gi-ban sa Bukidnon ang pagpasulod og mga poultry products nonot na sa kumpirmadong kaso sa Avian Influenza (AI) Type A Subtype H5N1 sa nasud.
Kini pinasikad sa gipagawas nga Executive Order No. 5, series of 2022 ni Provincial Governor Jose Ma. R. Zubiri, Jr. pinitsahan niadtong Marso 10, 2022 nga muluntad sa 45 ka adlaw, gikan sa Marso 10, 2022 hangtud sa Abril 25, 2022 gawas kon bawion o lugwayan ang maong kamanduan.
Tungod niini, hugot nga nagbantay pinaagi sa gimontar nga 13 ka mga Provincial Veterinary Sanitary Checkpoints ang Bukidnon arun masusi og mapahibalo sa gapangagi gikan sa nagkalainlaing rihiyon sa pagdili sa domestic ug wild birds, poultry products ug mga by-products.
Samtang tugutan lang nga makasulod ang de-lata nga poultry goods kung adunay tukma nga mga dokumento lakip transshipment sa imported nga day-old nga mga piso, day-old pullets, pagpusa sa mga itlog gikan sa international airports ug seaports sa Luzon paingon sa Bukidnon.
Kahibaloang adunay kumpirmadong kaso sa Avian Influenza (AI) Type A Subtype H5N1 ang itik farm sa Baliuag, Bulacan ug Candaba, Pampanga ingon man ang pugo farm sa Candaba ug Mexico, Pampanga.
