Owa it ginapatuman nga lockdown ag padayun eang ro pagpangabuhi it mga taga South Korea sa pihak it pagtaas it kaso it covid-19 makarun bangud sa omicron variant.
Raya ro ginhayag sa Brigada News FM Kalibo ni Mary Dy Cho, native it Kalibo, Aklan ag mabuhay eon nga nagaistar sa Seoul South Korea.
Si Cho hay sangka Kindergarten teacher ag maga daywang dag-on eon segun sanda nga nagapatigayun it face to face classes halin sa Kindergarten hasta College.
Bukon man segun it sapilitan ro pagpabakuna igto pero kanda nga mga manugturo hay required.
Malisud man segun ro owa it bakuna igto bangud indi makasueod sa mga supermarket, hospital, department store ag restaurants.
Tapos eonman haeos segun sanda it andang 3rd vaccine ag nagahueat eon lang para sa 4th vaccine kontra sa covid-19.
Sa pihak nga sa 86 percent eon it mga South Koreans ro nabakunahan, nakalista gihapon ro nasyun it 201 percent increase sa average daily cases ku nagtaliwan nga daywang dominggo.
Samtang, kara eamang nga Huebes, March 3, hay na-test positive sa covid-19 si South Korean Prime Minister Kim Boo-kyum. / ANN DESLENE SALAZAR
