Nagtuo si Davao City Mayor Sara Duterte-Carpio nga dili na kinahanglan makita pa sa publiko iyang pagpabakuna aron lamang makombinsi ang kadaghanan nga magpabakuna usab sa Covid-19 vaccine.
Atol sa pahayag sa mayor sa niaging adlaw, paigo na matud pa ang hugtanon niining adbokasiya ug panawagan sa mga residente nga kinahanglan gayud magpabakuna aron dunay proteksyon batok sa virus.
Kalabot niini wala sab mihatag og detalye ang Mayor kung kanus-a kini magpabakuna ug gitataw nga dili pinugsanay ang pagpabakuna sanglit boluntaryo lamang kini.
Bisan pa man niini gidasig si Mayor Inday ang publiko ilabi na niadtong nagduha-duha, nga mohimo og kaugalingong research sa scientific evidence sa bakuna aron dunay saktong sumbanan ang pagabuhatong desisyon sa pagpabakuna.
Kahibaluang gawas kang Mayor Inday, wala pa sab gipagawas nga impormasyon kung nagpabakuna na ba ang ubang duha ka igsoon niining sila si First District Representative Paolo Duterte ug Davao City Vice Mayor Sebastian Duterte.
