Gin-patawag ni Vice Governor James “Mitang” Magbanua ang mga coastal technicians sang mga banwa nga nahamtang sa coastal areas sang Capiz nga ginalakipan sang Roxas City, Pilar, Pres. Roxas, Pontevedra, Panay, Ivisan kag Sapian.
Suno sa ila diskusyon, luyag nila nga magpa-pasar sang isa ka Ordinansa nga maga kuwa sang mga illegal fish cages kag illegal structures sa mga baybayon nga kabanwahan sa probinsya sang Capiz kag paghatag sang alternatibo nga pangabuhi-an nga mga posible ma-apektohan sang nasambit nga regulasyon.
Ila man gin-istoryahan ang pagtapna sang illegal fishing sa probinsya, ang pag-deklara sang mga areas nga pwede mag-pangisda kag ang pagbaylo sang mga kagamitan pang-pangisda sa mga fisherfolks nga naga-usar sang mga bawal nga gamit sa pag-pangisda.
Nakasugtan man sa meeting ang pag-require sang business permit sa mga fish cage/pen owners bag-o sila maka-operate, ang pag-set sang tama nga distansya halin sa shorelines sa diin pwede maka-pangisda, kag sundon sang mga fisherfolks ang kadaku-on sang lambat nga paga-gamiton.
GInkalipay naman ni Vice Gov. Magbanua nga halos tanan nga mga coastal municipalities, lakip na ang syudad sang Roxas, ang nakapasar na sang ila tagsa ka mga ordinansa para maregulate ang pagpangisa sa ila tagsa ka mga lugar nga nasakupan.
Kaupod sa sini nga meeting ang mga katapo sang Bureau of Fisheries and Aquatic Resources (BFAR); Fisheries Management Area (FMA 11); Department of Environment and Natural Resources, Capiz Environment and Natural Resources Office o CapEnRO, kag Board Members Thea Faith Reyes kag Cecilio Fecundo.
Ini nga meeting kasunod sa mandu ni Gov. Fredenil “Oto” Castro nga i-regulate ang pagpahamtang sang mga estraktura kasubong sang fish cages sa mga kasubaan kag kadagatan sang probinsya.
