UNDANGON na sa Archdiocese of Davao ang pagsunod sa ginatawag nga Arancel system o ang pagpangayo og bayad bugti sa pagpahigayon og misa sa patay, haya, bisan sa funeral blessing.
Kini human gipagawas ni Archdiocese of Davao Archbishop Romulo Valle sang usa ka decree aron tapuson na ang pagtuman sa tradisyonal nga sistema sa pagpangolekta og pondo gikan sa katawhan.
Kahibaluang ang pondo nga malikom gikan sa maong sistema ang ginagamit usab aron supurtahan ang mga aktibidad ug ubang proyekto sa simbahan.
Tumong sa mando ni Archbishop Valles nga itisok sa huna-huna ug kasing-kasing sa mga Katoliko ang spirit of stewardship ug paghatag og responsbilidad sa mga deboto nga kinasing-kasing mohatag sa pinansyal nga panginahanglanon sa parokya.
Pinaagi matud pa niini, mas mapalig-on pa ang pagtuo ingon man pagdawat sa mga sakramento ug pagpa-bendisyon.
Giuyonan usab kini ug pormal nga ipahibalo kagahapon Dominggo, Abril 24, 2022 atol sa Feast of Divine Mercy busa sa Archdiocese of Davao, gimando sa mga parokya, sa GKK chapels o funeral homes nga hunungon na ang maong sistema ug wala nay ibungat nga kantidad nga ihatag sa mga pari/parokya/GKK servant leaders ug anaa ra sa mga tawo ug pamilya nga hingtungdan ang pagtanyag sa gusto nila nga kantidad isip Halad-Pasalamat.BNFM-DAVAO
