Makaalarma eon ro padayun nga pagtaas it kaso it covid-19 sa probinsya it Aklan.
Base sa pamunuan it Provincial Health Office (PHO-Aklan), makaalarma ro pagtinaas it kaso it nasambit nga virus sa nagkasari-saring banwa sa probinsya.
Umpisa July 18, 2021 hay nagtaas ro daily average attack rate (ADAR) kung siin owa naganaba sa 140 ro kaso kada adlaw.
Sangka record-breaking man suno sa PHO-Aklan ro nailistang 216 nga kaso makarung July 29.
Nasayuran nga punuan eonman ro ICU ag covid wards it Aklan Provincial Hospital ag iba pang private hospitals.
Uman nga nagpanawagan ro PHO-Aklan sa publiko nga magsunod gid sa ginapatuman nga health protocols.
Nasayuran nga nagapanguna makarun ro Aklan sa bilog nga Western Visayas sa may pinakamaabu nga kaso it covid-19 nga nagaabot sa 7,871. / ANN DESLENE SALAZAR
