May apat ka mga gin-endorso nga “probable source” sang bonus para sa mga empleyado sang Kapitolyo Probinsyal ang pamunu-an sang Progressive Alliance of Capitol Employees ukon PACE para sa karon nga bulan sang Disyembre.
Sandig kay Ranelo Lastierre, nagapamuno sang Capitol’s Safety and Security Division kag Presidente sang PACE, ang ini nga pagakuhaan sang pundo amo ang CNI ukon Collective Negotiation Incentive bonus kun sa diin sa Circular nga ginpapanaog sang Department of Budget and Management ukon DBM ang mga empleyado mahimo makabaton sang bonus kutob sa P25,000, PEI ukon ang Productivity Enhancement Bonus nga P5,000, IBES ukon ang Incentive Benefits for Exemplary Services kag SRI ukon Service Recogntion Incentives.
Ginpahayag ni Lastierre ini tanan ang “unanimously approved” sang Board of Directors sang PACE kag sa karon ila na lamang ginhulat ang ‘final announcement’ ni Governor Eugenio Jose Lacson kun pila ang pundo nga igapain sang probinsya para sa IBES kag SRI ukon pila ang pangkabilugan nga bonus nga mabaton sang mga empleyado sang Kapitolyo Probinsyal para sa karon nga bulan.
Nagalaom si Lastierre mismo sa adlaw sang kaadlawan ni Governor Lacson iga-annunsyar sini ang pangkabilugan nga bonus sang mga empleyado dungan sa pagapatigayunon nga ‘lights on’ sa Disyembre 13, 2021.
