MOKABAT sa 3.4 Milyon kantidad sa shabu ang nakonpiska sa Philippine Drug Enforcement Agency kun PDEA-12 pinaagi sa usa ka anti-narcotic operation nga gilangkuban sa PDEA Cotabato Provincial Office, PDEA Sarangani Provincial Office, Midsayap Municipal Police Station ug 34th Infantry Battalion.
Natigayon ang operasyon pasado alas 4:30 sa hapon, Enero 5, 2022 sa Brgy. Salunayan, Midsayap, Cotabato Province, nga miresulta sa pagkaaresto sa suspek nga si Jacky Guimba Manalac alias Datu, 23 anyos, residente sa Sharriff Saydona Mustapha, Maguindanao, kinsa misuway og pakig-away sa mga operatiba pinaagi sa pagpabuto sa iyang pistola.
Kapin sa 10 ka dagkong sachet sa shabu nga may gibug-aton sa 500 gramo, buy-bust money, cellphone, motorsiklo ug caliber 45 nga pistol ang narekober sa mga otoridad gikan sa suspect. Matud ni PDEA-Regional Director Naravy Duquiatan kini ang unang dakong kantidad sa iligal droga nga nakonpiska karong tuig 2022, ug nagpadayon ang kampanya batok sa mga iligal drug users sa tibook rehiyon-12. I Enamie Mogpon
