Na rescue sa mga sakop sa Provincial Drug Enforcement Unit sa Cebu Provincial Police Office ang tulo ka mga menor de edad nga lalaki ug usa ka hingkod ang panuigon ang nadakpan.
Kini atol sa gipahigayon nga buybust operation sa operatiba sa PDEU pinangulohan ni Pol. Major Joey Bicoy didto sa Zone 2 Purok Accasia Brgy. Biasong Talisay City Cebu pasado alas 4 ang takna kagahapon sa hapon.
Nadakpan ang subject sa ilang operasyon nga usa ka Albert Conde Guia 32 anyos nga lumad taga Brgy. Cabug Loon Bohol.
Samtang na rescue ang tulo ka mga batan-ong lalaki diin ang duha 15 anyos ug ang usa 14 anyos nga pulos molopyo sa Mahayay 1 A. Lopez Street Calamba dakbayan sa Sugbo.
Kapin sa duha ka kilo nga drugas ang nasakmit gikan mismo kang Guia nga gibanabana nag mokantidad sa 13 milyones kapin ka pesos.
Matud ni Pol. Major Bicoy nga base sa ilang nadawat nga report, ang mga menor de edad gihimo usab nga tig distribute sa mga iligalista sa ginadiling drugas bugti sa suhol nga usa ka libo ngadto sa dos mil pesos.
Gibutyag usab ni CPPO Director Elmer Lim kinsa miadto mismo sa dapit diin gipahigayon ang operasyon, nga ang maong pagkasakmit sa mga drugas subay usab kini sa gihimong mga follow up operation sa operatiba sa mga nilabay nilang operasyon sama sa niaging buybust operation didto sa lungsod sa Consolacion sa nilabayng buwan nga miresulta sa pagkasikop sa usa ka ginang. Gisuta karon sa kapolisan kung kinsa ang tinubdan sa maong mga drugas ug kinsa usab ang mga bagsakanan niini dinhi sa Sugbo.
