BICOL – NANGAPUDAN ngunyan an Overseas Workers Welfare Administration Bicol sa mga OFWs na may pending program application sa ahensya na tulos na makipagkoordinar sa saindang opisina.
Segun sa OWWA-Bicol, dai soboot kaya makontak sa paagi nin apod, text messaging asin e-mail alagad mayong simbag o kasimbagan sindang nareresibe gikan sa mga ini.
Kinakaipuhan soboot kayang makipag koordinar kan nasabing mga OFWs sa saindang mga oficina para sa nagkapirang mga concerns katakod kan saindang aplikasyon.
Maabot man sa sisenta y singkong mga OFWs na may pending application an mawot na maka koordinar kan OWWA kun saen mahihiling an kumpletong lista kan mga pangaran sa saindang official facebook page na OWWA-Bicol.
Pangapudan kan ahensya sa mga ini, makipag koordinar sa sainda antes matapos an semanang ini.
Mantang inuran man nin mga kahaputan gikan sa mga netizens an post na ini kan OWWA-Bicol kun kadaklan an naghahapot sa status kan saindang aplikasyon na soboot haloy nang nakapag submit nin mga requirements alagad mayo pang update na nakukua gikan sa ahensya.
Simbag man kan OWWA, gabos na concerns kan mga OFWs asin iba pang program beneficiaries an dapat na iagi sa tamang platform tanganing masimbagan nin tultol.
Siring man pig ingganyar an mga ini na na ipadara an mensahe asin bilog na detalye kan aplikasyon sa saindang e-mail na [email protected].