Walang confidential funds ang Office of the Vice President na nakapaloob sa National Expenditure Program para sa susunod na taon.
Sa pulong balitaan sa Kamara matapos ang ceremonial turnover ng proposed national budget, sinabi ni Budget Secretary Amenah Pangandaman na 10.28 billion pesos ang confidential at intelligence funds sa NEP.
Mas mababa aniya ito ng 16 percent kumpara sa CIFs sa 2024 General Appropriations Act na umabot sa 12.378 billion pesos.
4.37 billion pesos mula rito ang confidential funds habang 5.92 billion pesos ang intelligence funds.
Kabilang sa mga ahensyang mayroong CIFs ang Department of National Defense na may 1.70 billion pesos; National Intelligence Coordinating Agency o NICA na may 991 million pesos; Philippine National Police na may 806 million pesos at PDEA na may 500 million pesos.
Tatanggap din ng CIF sa NEP ang Department of Justice na may 579.4 million pesos kasama na ang Immigration at NBI; Finance Department na may 79.5 million pesos kasama ang Bureau of Customs at BIR at Department of Transportation kasama ang Philippine Coast Guard na may 405 million pesos.
Pinakamaliit ang alokasyon sa Commission on Human Rights na may isang milyong piso.
