Masluag nga restriksyon ug mga sumbanan ang musugat sa mga Dabawenyos sugod ugmang adlawa Marso Uno kini tungod ipaubos na sa New Normal category o Alert Level 1 ang Davao City hangtud sa Marso 15 kasamtangang tuig.
Nagpasabot kini nga balik na sa 100% ang capacity sa outdoors ug indoor private o public establishments, lakip usab ang public transportation by land, air o sea, pwede na ang mga ginagmay nga panagtapok apan hugot gihapon tumanon ang health ug safety protocols subay sa Inter-Agency Task Force kon IATF.
Tungod sa maong kalambuan, gikalipay sa daghang mga negosyante ilabi na ang publick utility vehicle drivers ang “new normal” set-up aron makabawi tungod sa duha ka tuig nga gipatuman ang regulasyon sa pagpasakay sa pasahero.
Una na nang gibutyag ni Acting Presidential Spokesperson Karlo Nograles, nga lakip sa mga ginalantaw nga criteria sa Alert Level 1 ang low to minimal risk classification, dili mu-sobra sa 50% nga okupado ang mga balay-tambalanan, nabakunahan na ang kapin 70% sa populasyon ug 80% alang sa mga senior citizens.
Ang ubang mga syudad ug lungsod gikan sa Davao Oriental, de Norte, del Sur, Occidental ug Davao de Oro anaa sa Alert Level 2.
Sa pikas bahin, ang pagbutang sa syudad sa Alert Level 1 dungan usab sa ika-85th Araw ng Dabaw ugmang adlawa.
Base sa abiso, ipahigayon pa gihapon virtual ang pagsaulog nag sugdan pinaagi sa Misa ng Pasasalamat alas 8:30 sa buntag nga sugdan dayon sa opening ceremony ug ubang aktibidad sama sa Tilaw Dabaw, Pasidungog; Garbo sa Dabaw, Hugyaw sa Dbaw All Stars, Pasasalamat ug Pahalipay.
