Temporaryo unang gipaundang sa lokal nga panggamhanan sa lungsod sa Nabunturan Davao de Oro pinaagi sa Environment Resources Bureau ang tanang mining operations sa lugar.
Kini tungod sa posibleng epekto sa daot nga panahon nga nasinati sa probinsya ug sa ubang bahin sa Davao Region gumikan sa Low Pressure Area ug Easterlies.
Gawas sa mga barangay nga dunay mining area, gitumbok usab ang mga barangay nga bahaonon, landslide-prone nga mag-igmat.
Naperwisyo usab ang byahe sa mga motorista human midahili ang yuta ug natabunan ang 6-lane nga dalan sa Barangay Tapia, Montevista.
Samtang report usab sa Nabunturan Municipal Disaster Risk Reduction and Management Office ang landslide nga nahitabo kagahapon sa Purok 1, San Isidro nga maoy hinungdan sa pagkabalda sa byahe.
Hinoon ang DPWH, Davao de Oro PEO ug hintungdang municipal local government units dali nga naglusad og clearing operations.
Kahibaluang nakasinati sa kasarangan hangtud sa kusog nga pag-ulan ang dakong bahin sa Davao Region kagahapon tungod sa gibantayan nga LPA ug easterlies.
Sa pikas bahin, gimonitor usab karon sa Davao City Disaster Risk Reduction and Management Office ang Davao River nga kasamtangang anaa sa code orange o warning level tungod sa padayong pagsaka sa tubig gikan sa kabukiran.
