Kapin sa 86.2% sa kabilugan nga 18,660 households sa banwa it Kalibo ro may CR o basic sanitation facilities; kapin sa .3% ro may unimproved toilet facilities, samtang may .4% gihapon ro nagpatigayun it open defecation o nagapandihu bisan siin.
As of July 2022, ro mga barangay sa Kalibo nga nagapatigayun gihapon it open defecation hay ro Tigayon, Tinigao, Andagao, Bakhaw Norte, Pook, New ag Old Buswang, Linabuan Norte, Bakhaw Sur ag Briones.
Suno kay Mr. Peter S. Mangilog, Senior Statistical Specialist it PSA-Aklan, ro mga raya hay nagakinhangean it atensyon ag assistance halin sa LGU Kalibo para makaangkon it access sa sanitation facilities ro mga raya.
Ro nasambit nga datus hay ginpresenta sa ginpatigayun nga Data Turnover Ceremony 2022 Community-Based Monitoring System (CBMS) it PSA-Aklan ag LGU Kalibo. // ANN DESLENE SALAZAR
