Tungod nga gi-ablihan na ang international flights sa nasud, posible matud pa nga makasulod ang omicron variant nga usa matud pa nga gikahadlokan sa dakbayan sa Davao.
Kini ang giluwatan ni Davao City Mayor Sara Duterte-Carpio dungan sa pagpahinumdom niini sa mga Dabawenyos nga hugtanon gihapong mutamod sa health protocols batok Covid-19.
Bisan matud pa niubos na ang kaso sa maong virus dinhi syudad, padayon gihapon nga nanawagan ang Mayor sa publiko nga dili magkumpyansa ilabi na nga aduna nay bahad sa omicron variant.
Gikaingon nga ang nahisgutang variant mas makatakod kung itandi sa mga naunang variant hinungdan nga nabalaka ang LGU Davao nga posibleng makasulod kini sa Davao City ilabi na nga miluag na ang restriction batok covid-19 ilawom sa Alert Level 2.
Giangkon ni Mayor Sara nga dakong hagit ang pagpahimutang sa alert level 2 sa syudad partikular na ang pagpatuman sa health protocols, social distancing ug mass gatherings.
Kahinumdoman nga una ng gibutyag sa Mayor nga posibleng masinatian ang surge sa syudad tungod sa holiday season.
