Ginpatuman sa pila ka mga establisyimento ag taeatapan it gobyerno ro “no vaccination card, no entry” policy agud matapna ro makaalarma nga pag-abo it mga kaso it COVID-19 sa Aklan.
Angot dikara nagkabisa ku Enero 17, ro “no vaccination card, no entry” sa Aklan Electric Cooperative, Inc. (Akelco) partikular sa mga nagapanguna nga taeatapan sa Lezo ag mga opisina sa Boracay Island, Altavas, Andagao (Kalibo), Pandan (Antique), Banga, Nabas, Ibajay, ag Caticlan (Malay).
Nagakinahangean man it mga vaccination card ro Altavas public market bilang parte it inisyatiba nga mapunggan ro coronavirus.
Sa pihak pa kara, ginpahanumduman it pamunuan it Kalibo supermarket ro mga manugbakea nga daehon ro andang mga vaccination card bago makasuoed sa establisyimento.
Samtang, pisikal nga sarado ro mga regional court ag municipal circuit trial court sa Kalibo, Banga, Makato, New Washington, Ibajay, Altavas, Makato, Buruanga, ag Malinao halin Enero 13 hasta Enero 31, 2022, matapos nga ginpaidaeom sa Alert Level 3 ro priobinsiya it Aklan./JIL B. LACSON
