BICOL – IPINAHAYAG kan Department of Public Works and Highways o DPWH-Bicol na operational na an nasa bente singkong mga commmunity health facilities sa apat na probinsya sa rehiyon.
An sinambit na mga pasilidad na igwang kinyentos na total bed capacity iyo an ‘priority project’ kan DPWH-Bicol asin kan National Disaster Risk Reduction and Management Council o NDRRMC.
Siyam sa mga ini an madudukayan sa provincia kan Camarines Norte; pito sa Camarines Sur; anom sa Albay asin igwang tulo sa Masbate.
Segun ki Lucy Castañeda, tagapagtaram kan DPWH-Bicol, resulta ini kan pakikipagtabangan sa NDRRMC kun saen gagamiton an sinambit na mga pasilidad bilang quarantine facilities para sa mga covid-19 probable asin suspects.
Dugang pa kaini igwang electrical connection an kada pasilidad kun macicierto na magiging ligtas asin komportable an mga indibidwal na madagos digdi siring man dai mapuputol an saindang komunikasyon sa saindang mga mahal sa buhay.
Alagad pangapudan kan DPWH-Bicol sa mga LGUs na iyong mamahala pati sa mga mismong magamit kaini na ingatan asin mantineron na malinig an mga pasilidad tanganing mas dakul pa an makinabang.
Mantang target man kan ahensya na mapunan an konstruksyon kan parehong mga pasilidad sa mga probinsya kan Catanduanes asin Sorsogon sa urog na madaling panahon.
