Tungod sa duwa nga scatter, nagtingkagol sa prisohan ang 27-anyos nga lalaki human nang-snatch og cellphone sa usa ka motorista kagahapon sayo sa buntag sa may stoplight sa Gen. Maxilom Avenue, Corner Imus Road, Barangay Lorega San Miguel, dakbayan sa Sugbo.
Sa nasayran, ang 25-anyos nga motorista nga biktima nihunong sa stoplight og naggamit sa iyang cellphone, apan pipila ka minuto, adunay lalaki nga niduol og nikuha sa iyang iPhone 15 pro max nga cellphone.
Nagpakitabang kini sa kapulisan, og swerte nga pasado alas 11 kagabie sa susamang adlaw, atol sa follow up operation sa kapulisan sa Parian police station, nasikop ang 27 anyos nga si alyas ‘boy scatter’, taga Sitio Ponce 1, Brgy. Carreta, dakbayan sa Sugbo.
Atol sa pagkasikop, wala na narecover ang maong cellphone tungod kay na prenda na kini sa kantidad nga Php16,000 pesos, ang maong kwarta iyang gipalit og bag-ong cellphone ug gibayad sa utang tungod sa scatter.
Nanghinam ni siya kay matud niya nakadaog siya og 40k pesos og didto nagsugod na siyag kaboang sa duwa nga scatter.
