Patay ang usa ka driver sa pribadong sakyanan human niini nabanggaan ang nakaparadang trak sa Barangay Mabuhay, Bansalan, Davao del Sur pasado alas 12:00 sa kagabion.
Sa report sa Bansalan Municipal Police Station giila ang biktima nga si Norhamsa Macabangen, nga taga Bagwa 3, Cotabato City.
Nasayran sa imbestigasyon nga nag-ilis sa mibuto nga ligid ang drayber sa trak nga nailang si Jhun Namia sa dihang misampak sa likod nga bahin ang gimanehong sakyanan ni Macabangen.
Gisulayan pa og dala sa balay tambalanan ang biktima apan gideklara na kining patay sa doctor.
Subay sa imbestigasyon ni Police Executive Master Sergeant Randy Fiel ang traffic investigator sa maong kapolisan nasayran nga nagtaod matud pa og early warning devise ug hazard light ang drayber sa trak samtang nag-ilis og ligid apan aksidente gihapon kining nabanggaan sa biktima.
Sa pagkakaron gikustudiya sa kapolisan si Namia samtang nagdagan pa ang imbestigayon sa maong hitabo. BNFM-Davao
