GIBUTYAG ni Thelma Monderondo Active Community Based Division Chief sa City Social Welfare and Development Office kun CSWDO nga anaa na lang sa usa ka gatus ka pamilya ang nagtinir sa evacuation center sa Romana Elementary School sa Barangay Calumpang.
Ang pipila niini mibalhin na og puyo sa ilang mga paryente ug ang uban mibalik sa Purok Saeg ug giayo ang ilang mga balay. Gisultian matud pa sa mga opisyal sa Barangay ang mga apektadong pamilya nga samtang gina-proseso pa sa lokal nga panggamhanan ang paliton nga luna aron himoon nga relocation area, mangita usa sila og temporaryong kapuy-an.
Sumala ni Monderondo ang 500 ka pamilya nga nasunugan nakadawat na og financial ug livelihood assistance gikan sa DSWD, shelter assistance gikan sa National Housing Authority ug mga livelihood program gikan sa DOLE ug anaa pay mga pinansyal nga hinabang gikan sa ubang mga ahensya sa gobyerno.
Mahimo na nila kining magamit sa pagpangita og luna kung asa sila magpuyo. Kahibaluan nga karung adlawa usab ang ulahing adlaw nila sa evacuation center tungod magpahigayon og assessment ang taga Department of Education sa mga tulunghaan alang sa ipahigayon nga face to face classes. (Enamie Mogpon)
