UBAY-UBAY gihapon ang nagpabakuna karong adlawa nga nagsayo sa pag-adto sa gymnasium aron nga makauna sa pila ug maka fill up og form sa vaccination samtang ginapahinumdom sa mga nagapila nga dapat kumpleto ang ilang pag fill up aron nga dili na magpabalik balik sa pila.
Nasaksihan sa taga Brigada ang unang hugna sa ikaduhang adlaw sa national vaccination sa Barangy Apopong gymnasium kung asa alas 5 pa sa buntag aduna nay mga tawo nga nakapila sa gawas sa gym, naghulat kanus-a ablihan sa mga tanod aron sila makasulod og makalingkod sa mga bangko nga nakahilira ug may distansya.
Nagamit usab sa barangay ang serbisyo sa ilang personahe sa Waste Management nga sayo nga nagamata aron manghinlo sa palibot sa pagpanguna ni Neneng Nuñez.
Sumala kay Jhemvic Barcatan nga ilang ginasiguro nga ma-asikaso ug mahatagan og form ang matag usa unya masuta kon si kinsa ang mga senior citizens, mabdos, nagapasuso ug bata kay sila ang ma-priority sa pila.
Sumala sa usa ka amahan nga si Boyeng gidaug gayod niya ang iyang kahadlok ug kabalaka sa bakuna nakahukom gayod kini sa pagpabakuna.
Sumala usab kay Grace Ababon nagapasalamat siya sa nationwide vaccination kay nakahigayon gayod sila.
Gikuyogan niini ang duha ka anak nga wala pa nabakunahan, naga-edad 17 ug 18-anyos aron batukan ang COVID-19.
Wala pa gani daw siya namahaw aron lang nga makauna sa pila kay init na kon udto na moadto sa venue.
Kahibaluan nga Desyembre 1 ang ikatulong adlaw sa National Vaccination Day. ( Ver Diazon)
