LEGAZPI CITY – Pigkukwestiyon ngonian kan nagkapirang mga member-consumers kan Albay Electric Cooperative Inc. (ALECO) an subuot magkaibang electricity price para sa bulan kan Hunyo na pigpresentar sa kakatapos sanang Annual General Membership Assembly (AGMA) 2024 kumpara sa pig-anunsyar kan kooperatiba sa publiko.
Segun sa ibang mga miyembros asin konsumedores, “confusing” subuot an datos na pig-anunsyar kan ALECO sa publiko kun sain kun magigirumduman, pig-anunsyar kan kooperatiba sa June 2024 Powe Rates Advisory, na naglangkaw subuot an singil sa kuryente para sa Mainland asin Island consumers.
Sa nasambit na abiso, uminabot sa P13.92 per kilowatt hour an singil para sa residential para sa mainland sa bulan kan Hunyo ngonian na taon, kun sain iba ini sa pigpresentar ni ALECO Acting General Manager Engr. Wilfredo Bucsit sa isinagibong AGMA kun sain P12.68 per kilowatt hour sana subuot an price rate para sa parehas na bulan asin mainland-residential consumers.
Dahil digdi, dakol an nalibong asin naghahagad nin kapaliwanagan sa nasambit na kooperatiba para malinaw an siring na magkaibang datos. Kun magigirumduman, dakol na Albayano an nabigla sa pag-taas nin singil sa kuryente para sa bulan kan Hunyo ngonian na taon
