PATAY ang usa motorista human mibangga sa concrete center island sa circumferential road sa Barangay Mabuhay, GenSan Setyembre 7 sa kadlawon.
Giila sa rekord sa Traffic Enforcement Unit (TEU) ang namatay nga si Mark Angelo Panes, 26-anyos, minyo, taga Barangay Ligaya.
Sa imbestigasyon, gilatas ni Panes sakay sa motor ang dalan gikan sa roundball sa Barangay Apopong padulong sa circumferential road.
Pag-abot sa lugar tungod sa kakusog sa dagan sa motorsiklo nabangga kini sa concrete center island.
Matud ni Police Master Sergeant Jessie John Flores, investigator sa TEU nasuta nila nga naa sa impluwensiya sa ilimnong makahubog si Panes. Butang nga gikumpirma sa inahan niini, nagselebrar sila tungod hapit molarga sa Japan ang anak ug bag-o kining mibalik sa GenSan gikan Manila.
Si Panes ang ika-30 katao na nga namatay sa bangga sa GenSan gikan Enero 1 hangtud Setyembre 7 ning tuiga. I Richel Gubalani
