Permado na ang Memorandum of Agreement ni Governor Fredenil Castro kag Philippine Crop Insurance Corp (PCIC) nga may tigulo “PROVISION OF CROP INSURANCE AND CREDIT AND LIFE TERM INSURANCE COVERAGE OF RICE AND CORN FARMS AND FARMERS UNDER THE CALAMITY CROP INSURANCE PROJECT THROUGH PREMIUM SUBSIDY SCHEME”, sang Hulyo 6.
Ang madasig nga tikang kag pag-aksyon nga ini sang Local Government Unit- (LGU) Capiz sa pagpanguna ni Gov. Castro sa pagrekomendar sa PCIC nga ma accredit na ang Provincial Rice and Corn Commodity Coordinators sang Office of the Provincial Agriculturist bilang underwriters sang PCIC ang nagahandum nga gilayon na mapatuman sa probinsya sang Capiz ang nasambit nga proyekto sa maabot nga tion sang tig ululan.
Daku ang mabulig sini sa Capisnon agud masiguro ang bastante nga produksyon kag suplay sang pagkaon sa probinsya partikular na ang palay kag mais kay ini nga mga pananom ang masami apektado sa tion sang bagyo, baha, ukon tig ululan, peste, balatian gani ini nagakinahanglan gid nga madala sa crop insurance.
Yara sa guidelines sang MOA amo ang pag transfer sang Gobyerno probinsyal sang Capiz sang pondo nga nagabalor sang P3,000,000 pakadto sa PCIC R06 nga pagagamiton sa implementasyon sang nasambit nga proyekto nga magasugod sa wet season sa subong nga tuig 2023. Sa nahibaluan nga sa bug-os nga Pilipinas pila pa lamang ka probinsya ang nagpatuman sini nga programa kag ang probinsya sang Capiz ang labing una sa Western Visayas.
