GIKOMPIRMA mismo sa 8th Infantry Battalion (8IB) PA Army nga napalgan nila ang patayng lawas sa usa ka miymbro New People’s Army (NPA) fighter sa hilit nga dapit sa Sitio Kilap-agan, Barangay Can-ayan, Malaybalay City, Bukidnon.
Mismo si 8IB acting civil-military operations officer Maj. Lemuel Bacarro, nagbutyag nga giila kini nga si alyas “Prodo” sa iyang duha ka kauban kinsa mitahan ug mitudlo sa nahimutangan sa patayng lawas sa maong NPA.
Una na matud pa gibutyag sa kanhi rebelde nga naigo si Prodo sa tiyan nga bahin atol sa engkwentro niadtong Marso 3, 2022 ug ang patayng lawas nabiyaan sa maong dapit samtang ang mga kauban nanagan palayo sa encounter site.
Kahibaloang adunay unom ka mga rebeldeng NPA sa Malaybalay City ang misurender human sa engkwentro niadtong tungura diin giangkon niini nga nakasinati sa kalisdanan ug kagutom sa bukid, 3 niini ang ang mga lider sa grupo duha ang mga medik, ug usa ka lider sa iskwad nga nag-operate kaniadto sa area of responsibility sa 8IB.
Samtang gipasalig usab sa kasundaluhan karun nga makadawat og tukmang mga benepisyo ubos sa Enhanced Comprehensive Local Integration Program (E-CLIP) ang mga mitahan samtang gipasalig usab nga hatagan og desenting lubong ang kaubang namatay.
