Arestado ro daywa ka eaeaki matapos magpanakaw it cellphone sa sangka sari-sari store sa Banga Public Market kahapon.
Ginkilaea ro mga suspek nga sanday Bryan Villeza 35yo, sangka miyembro it LGBTQ ag Michael Tipan 35yo ag parehung residente it Sampaloc, Manila.
Sa report, matapos makabatun it tawag ro Banga PNP kaangot sa panakawan nga natabo, insigida sanda nga nagpatigayun it checkpoint rasun nga nadakpan ro mga suspek sa Diversion Road sa Barangay Mambog, Banga.
Base sa pahayag sa Banga PNP it complainant nga si Jaron Lachica 47yo, samtang sa sari-sari store imaw it anang hipag, may nagpundo nga motorsiklong kulay pink ag black.
Nagpanaog segun ro backrider ag nagpa eapit nga matsa may bakeon rasun nga nag agto sa likod ro biktima para tawgon ro anang hipag ag naaywan kara ro anang cellphone.
Pero pagbalik it biktima hay owa eon ro anang cellphone pati ro daywang suspek.
Kasong theft ro ginpasaka kontra sa daywang suspek matapos ma-inquest ro mga raya sa Aklan Prosecutors Office.
Samtang, ro sambilog sa naarestong suspek nga miyembro it LGBTQ hay iba sa suspek nga nahagip sa video nga viral makarun bangud sa ‘palit-pera’ modus ag iba pang pagsalisi sa pilang establisyemento sa Aklan. / ANN DESLENE SALAZAR
