DUNGAN sa padayong pagsaka sa presyo sa mga nag-unang palaliton, gisaka na sa Soccsksargen region ang daily minimum wage sa mamumuo sa pribadong sektor. Gikan sa kasamtangang salary rate nga P368 matag adlaw sa non-agriculture sector, mosaka na kini og P403.
Sa agriculture/ service/ retail sector gikan sa P347 karon, mosaka na kini sa P382 matag adlaw. Human giaprubahan sa Regional Tripartite Wages and Productivity Board (RTWPB) 12 ang bag-ong minimum wage sa rehiyon. Epektibo ang unang tranche nga naa sa P13 sa Oktubre 16 samtang ang ikaduhang tranche nga P22 ang epektibo sa Enero 1, 2024.
Matud ni Renato Gardose, senior labor employment officer sa RTWPB-12 , motu propio ang gihimong rebyu sa minimum salary rate. Kini tungod kay walay labor group nga nag-file og petisyon aron mapasaka ang daily basic sa lugar. Ang maong adjustment sa suhol sa mga mamumuo ang moepekto 15 kaadlaw human kini ma-publish sa lokal nga mantalaan. I Richel Gubalani
