Gibarugan sa 10th Infantry Division nga nagpabiling taas ang moral sa hut-ong sa militar luyo nga dunay pila ka retiradong heneral ang nagkanayong dismayado matud pa ang tibook Armadong Kusog sa Pilipinas kay Pangulong Rodrigo Duterte.
Matud kang 10th ID commander Maj. Gen. Ernesto Torres Jr., dakong supurta ang gibubo sa kasamtangang administrasyon sa militar hinungdan sa dili katupngan nga kalampusan nga nakab-ot ilabi na sa dibisyon sa 10th Infantry.
Partikular nga gitumbok sa opisyal ang Counter-insurgency operations sa ilang han-ay nga nagresulta sa pagbungkag sa daghang guerilla fronts nga nagaoperate sa ilang areas of responsibility.
Dugang ni Torres sukad Enero karong tuiga hangtud karon, moabot na sa 240 firearms, 605 Communist NPA Terrorists ang na-neuralisa kalakip dinhi ang 27 high ranking CTG leaders, ug ang pagpulpog sa guerilla fronts ug usa ka PBC nga gilangkuban sa: Guerilla Front South, Guerilla Front North, ug Pulang Bagani Command.
Malipayon usab matud pa ang ilang hut-ong gumikan sa mga kabag-ohan sama sa usbaw sa swledo sa AFP bisan sa PNP, BFP, BJMP ug Coast Guard.
Luyo sa mga isyu, gihingusgan sa opisyal nga padayon silang nakatutok sa paggukod sa nahibiling mga sakop sa New People’s Army aron tuldukan na ang local armed conflict.
Nag-ugat ang pahayag ni Torres human giyagyag ni retired Lt. Gen. Antonio Parlade nga dismayado ang armadong kusog sa Pilipinas sa Pangulo tungod matud pa sa pagpaulipon sa ubang tawo aron makontrol.
Una na usab gitubag sa pangulo ang maong isyu nga walay si bisan kinsa ang nagakontrol sa iyang mga desisyon ug plano.
