MOPASAKA og kaso ang otoridad batok mibutang sa dakong pukot sulod sa Marine Protected Area nga miresulta sa pagkamatay sa pawikan ug juvenile nga pating atong Oktubre 5 sa baybayon sa Maasim, Sarangani Province.
Matud ni Felix Alicer, Regional Executive Director sa Department of Environment and Natural Resources (DENR) 12 nakig-alayon na sila sa personahe sa Protected Area Management Office sa Sarangani Bay Protected Seascape ug PNP Maritime aron imbestigahan ang hitabo.
Sa ‘necropsy’ ang pawikan ang usa ka mature female Hawksbill Turtle nga critically endangered species. Pagkalumos ang nakitang hinungdan sa kamatayon sa pawikan human kini malambod sa dakong pukot. Samtang ang pating, nakitang hinungdan sa pgkamatay mao ang stress human nakasulod sa pukot.
Ang mga nagbutang og pukot sa marine protected area ang mag-atubang og kasong kriminal tungod sa pagsupak sa Wildlife Resources Conservation and Protection Act of 2001, Ang Expanded National Integrated Protected Areas System (E-NIPAS) Act of 2018, ug Philippine Fisheries Code of 1998. Una nang, nakitang patay ang pawikan ug pating sa mga scuba divers sa lugar. I Richel Gubalani