Ginmanduan sang Hepe sang Roxas City PNP ang iya mga imbestigador nga magpatigayon sang maid-id nga imbestigasyon sa natabo nga pagpanghold-up sa isa ka salesman sang frozen products sa Brgy. Dinginan, Roxas City.
Sa interview sang Brigada News FM Roxas City kay PLTCOL Francisco Paguia, iya ginpahayag nga ginapadalman na sang iya mga imbestigador ang natabo nga robbery agud mahibaluan ang matuod kag mapanabat ang may kahimuan sang krimen.
Ginpahayag man sang hepe nga consistent man ang statement sang biktima nga si John Vergil Rasgo kag madugay na ini sa iya trabaho kag wala man ini sang record nga naghimo sang malain.
Matandaan sa pagsaysay sang biktima, nagikan siya sa Teodoro Arcenas Trade Center (TATC) kag sang ini ang nagpauli, pag-abot sa national highway sang Brgy. Dinginan, hinali lang may nag-overtake sa iya nga TMX nga motorsiklo kag nagpundo kun sa diin nagdulog man ang biktima kag ginapahayag may nagdikit sa iya nga isa pa ka Bajaj nga motorsiklo nga may sakay nga duha ka lalaki kag gintutukan siya sang Caliber. 38 nga armas-luthang kag nagdeklarar sang hold-up.
Suno pa diri, natigayon nga makuha sang mga suspetsado ang duha niya ka bag nga naga-unod sang kwarta lakip ang yabi sang iya motorsiklo kag madasig nga nagpalagyo.
Maswerte man suno diri nga wala makuha ang iya cellphone, rason nga nagpanawag ini gilayon sa iya mga kaupdanan agud mangayo sang bulig sa mga kapulisan.
Dugang ni Paguia nga maligwin ang lugar kun sa diin natabo ang pagpanghold-up gani wala sang nakakita kag wala man sang CCTV. | Judy Ann Juare