NAPAHIBALO na sa market administration ang mga vendors sa kadalanan palibot sa Merkado nga takda silang pahawaon sa hingpit sa umaabot nga Oktubre 1 sa kasamtangan nga tuig.
Sa bahin sa usa ka vendor nga si Boyet gipahibalo na sila nga subli silang pahawaon sa dapit kung asa sila nagatinda adlaw-adlaw ug ang iyang reaksyon, supak sila sa mao nga lakang kay apektado silang tanan niini.
Ang mga rason ni Boyet kon pabalhinon sila sa Alunan unya didto mamaligya mamahimo nila nga kompetensya ang mga mag-uuma unya dili sila makasabay sa presyo kay kinumpra lang ang ilang tinda gikan usab sa mga mag-uuma.
Nakabalhin na usab sila sa Purok Islam nga atbang lang sa palengke nga apektuhan sila kay hinay ang halin mao nga wala sila nagdugay sa Purok Islam yg nibalik sa Casquejo area kay mas daku ang ilang halin.
Ang sugyot ni Boyet nga hatagan nalang sila og oras sa pagtinda sa buntag o hapon basta dili sila ibalhin sa laing dapit kay kon mohina ang ilang kita aduna siyay estudyante nga ginapa-eskwela, subra 20 ka tuig na usab daw siya isip vendor sa palengke.
Sumala usab sa laing vendor og sweetcorn ug prutas nga si Luz,naandan na sa mga tawo og sa ilang mga suki ang ilang pwesto matag adlaw,gikan alas 7 sa buntag hangtud sa gabei.
Nakasinati na daw siya nga nibalhin nga wala pa ang pandemya apan hinay ang halin mao nga dili siya uyon nga subli sila nga pabalhinon.
Kahibaluan nga una na gipahibalo sa Market Supervisor nga Lito Esclamado ang mga vendor ug sa miyembro sa Public Safety Office nga may gitakdang One Time Big Time Clearing Operation sa palibot sa merkado aron nga mahapsay ang kadalanan subay usab sa kamandoan sa pangulo nga hawanan ang mga kadalanan nga iya sa gobyerno ug ang laing rason mao ang padayong pagkatag sa COVID-19. ( Ever Diazon)
Photo: CTTO
