Nagareklamo ang mga vendor sang isda sa Teodoro Arcenas Trade Center nga malaka nalang ang ila benta bangud ang mga manugbakal didto na nagapadulong sa mga talipapa nga nahamtang sa ila barangay.
Sa interview sang Brigada News FM Roxas kay Joy, isa sa mga vendor, ginpahayag sini nga mahina ang ila benta kag nagakaabutan pa sang tatlo ka oras antes maubos ang ila baligya nga isda kag nagakalub-ok na sang hinulat sa mga magabakal.
Dismayado man ini sa pila ka mga vendor nga nagabaligya sa guwa sang merkado bangud suno diri naga-income na sila, wala pa ang mga ini nagabayad sang renta kag unfair man para ila nga nagarenta sa sulod sang TATC.
Suno pa kay Joy, kun wala lang sang talipapa sa kada barangay, sigurado ang mga manugbakal magapadulong gid sa TATC agud manindahan.
Ginpahayag man sini nga palarehas man lang ang ila nga presyo sa talipapa apang ginapili na lang sang pumuluyo nga magbakal sa malapit agud indi na magpamasahe.
Sa karon, ginahulat nalang nila ang ila grupo sa asosasyon nga maghilisugot nga idulog ang ila problema sa pamunuan sang TATC kag agud mapalab-ot man sa pagtamod ni Mayor Ronnie Dadivas agud mahatagan sang nagakaigo nga solusyon. | Judy Ann Juare
