Dakop ang duha ka persona nga ginakabig High Value Individual (HVI) sa ginkasa nga drug buy-bust operation sang mga kapulisan sa Sitio Sablayan, Brgy. Lomboy, Panay, Capiz takna alas 2:04 kaina sang kaaganhon, Pebrero 11.
Ginkilala ang mga nagkaladakpan nga sanday alyas “Toto”, yara sa legal nga pang-edaron, vulcanizer kag alyas “Munding” 34-anyos, mamumugon kag lunsay residente sang Brgy. Tanza sa nasambit nga banwa.
Narekober sa paghinakop sang mga nagkaladakpan ang 12 tanan ka sachets sang ginasuspetsahan shabu lakip na ang nabakal sang police poseur buyer, P6,600 nga buy-bust money; 1 black pouch; 1 unit cellphone kag 1 unit sang motorsiklo.
Ginabanta nagabug-at sang 80 gramos ang mga nakumpiskar nga iligal nga droga kag may Standard Drug Price nga P544,000.
Magapangatubang ang mga ini sang kaso nga paglapas sa Republic Act 9165 ukon Comprehensive Dangerous Drugs Act of 2002.
Sa karon, nagapabilin ang mga ini sa kustodiya sang Panay PNP para sa nagakaigo nga disposisyon. | Judy Ann Juare
