MODANGOP sa Local Government Unit sa GenSan pinaagi kang City Mayor Lorelie Pacquiao ang mga vendors nga naapektuhan sa clearing operation sa palengke sa syudad aron mahatagan og pagtagad ang ilang problema nga nahimong epekto sa kalisod sa ilang pagpanginabuhi.
Segun ni Miranda Limpao nagsabot na sila sa mga kaubanang vendors sa Santiago area nga magtigom aron mapaabot sa lokal nga gobyerno ang ilang kasinatian human nga sila ang nawad-an og pwesto sa laray. Boot niini nga matagad ang ilang problema gumikan apektado sila ug naglisod sa pagpangita og kwarta nga ipalit og pagkaon alang sa pamilya.
Plano sa mga vendors nga mudangop sa LGU sunod semana. Ang hangyo sa mga vendor nga mahatagan sila og husto nga lugar aron makalaray sa ilang tinda, unya naglisod usab sila nga mopwesto sa City Food Terminal Multi-Purpose Cooperative sa Alunan Bagsakan tungod naay bayad. Igo lang matud pa sa pang adlaw- adlaw nga pagkinahanglan ang kita ni Limpao sa pagpamaligya.
Naglaom ang mga vendors nga masolusyonan ang ilang problema pinaagi sa pagtugot kanila nga makapamaligya sa merkado bisan sa pipila ka oras. Kahibaloan Enero 3 sa buntag dihang gihimo ang clearing operation sa Cagampang, Casquejo, ug Santiago Boulevard dool sa Central Public Market sa syudad asa kapin 200 ka mamaligyaay ang naapektuhan. I Enamie Mogpon
