-Reymund Titong
NEGROS OCCIDENTAL, Philippines — Wala na gin-pahanugutan nga makabalik ang mga residente nga naga-estar sa sulod sang 4-kilometer permanent danger zone sang bulkan Kanlaon.
Pahayag ni Office of the Civil Defense (OCD)-6 chief Raul Fernandez, iya gina rekomendar nga dapat wala na sang mga pumuluyo ukon naga-pangabuhi sa sulod sang 4-kilometer permanent danger zone sang bulkan, agud mapalayo ang mga residente sa katalagman kun maglupok ang bulkan.
Ang possible ma sakop sang danger zone amo ang mga porsyon sang La Carlota, Bago, Murcia, kag La Castellana sa Negros Occidental, kag syudad naman sang Canlaon sa Negros Oriental.
Sa piyak nga bahin, pahayag sang alkalde sang La Castelllana nga si Rhummyla Mangilimutan, iya ginpabutyag nga maykabudlayan ang banwa sa pagpangita sang relocation site sang masobra 100 nga pamilya nga naga-estar sa sulod sang danger zone.
Nagapangayo naman sang bulig ang alkalde sa gobyerno nasyunal sa pagpangita sang relocation sites, base man sa rekomendasyon sang OCD 6.
Sa karun, base sa datus sang Municipal Disaster Risk Reduction Management Office sang banwa, nakapuli na ang 1,815 nga evacuees humalin sang Huwebes, Hunyo 20, apang may yara pa sa giyapon sang may nabilin nga mga tawo sa tatlo sini ka evacuation centers.*
