LEGAZPI CITY – Uminabot na sa 61.40% an completion rate kan mga proyekto kan Department of Interior and Local Government Bicol sa probinsya kan Albay kan taong 2023.
Segun ini kay DILG Bicol Regional Director Atty. Arnaldo Escober Jr., kun sain sa totalmenteng 57 proyekto sa probinsya 35 an tapos na mantang 20 an on-going o pigtatrabaho pa hasta ngunyan mientras sa ibang probinsya arog kan Camarines Norte, 55 sa 83 proyekto sa lugar an tapos na, sa Camarines Sur, tapos na man an 62 sa 107 na proyekto, an Catanduanes may saro na sanang on-ongoing sa 16 proyekto, 9 sa 17 proyekto man sa Masbate an natapos na, asin sa Sorsogon nasa 41 na an natatapos sa 85 proyekto.
Kun susumahon, nasa P1.7B an totalmenteng pig-alokar na pondo para digdi asin 261 an nabenepisyarang barangay asin basado sa datos 155 o 42% kan mga proyektong ini iyo an farm-to-market roads na may laba nang 59km, 81 o 22% an water and sanitation system, 57 o 16% an Health Sanitation, 54 o 15% an Rural Electrification mantang 18 o 5% an para sa school building.
Mientrastanto, padagos an pagkonstruhir kan ahensya nin nasabing mga pasalidad asin istruktura sa irarom kan naunambitang programa kun sain ngunyan nganing taon ugwa na ki limang proyekto sa probinsya kan Albay na pigpunan nang asikasuhon.
