LEGAZPI CITY – Piglalaoman na ngunyang bulan nin Enero taon 2024, reresiberon na kan mga paraoma nin paroy sa probinsya kan Albay an singko mil de pesos na kantidad nin tabang-pinansyal na inaapod na Rice Farmers Financial Assistance (RFFA).
Kinumpirmar ini kan Department of Agriculture (DA) Bicol, kun sain segun sa ahensya, an pondo para digdi hale sa PHP12 billion na Rice Competitive Enhancement Fund (RCEF).
Segun pa sa ahensya, naenot nang maresibe kan mga paraoma sa probinsya kan Camarines Norte, Camarines Sur, Masbate asin Catanduanes an kaparehong tabang-pinansyal kan nakalihis na bulan nin Disyembre.
Apwera man sa Albay, nakatalaan man na maresibe kan mga paraoma sa probinsya nin Sorsogon an siring na ayuda ngunyan man na Enero.
Oras su boot na mailaag na sa cash cards an cash assistance, mapaisi an ahensya sa lambang Municipal Agriculturists sa paagi kan pagtatao kan mga pangaran kan mga benepisyaryo, asin pwedesir na ining i-withdraw kan mga paraoma sa sain man na Bancnet ATM kiosk o sa USSC branches.
