BICOL – LIWAT na ipiglatag kan Technical Education And Skills Development Authority o TESDA sa Bicol an mga ipigoofrecir nindang sebisyo asin programa kasabay kan selebrasyon kan ika-bente sieteng anibersaryo kan ahensya.
Segun ki Ria C. Gomez – PIO designate, Senior TESDA Specialist, TESDA-Bicol, ini an week-long celebration kun saen apwera sa man iba ibang mga nakalinyang aktibidad, isinagibo man an pagtatao nin rekonosimiento sa mga empleyado kan TESDA-Bicol siring man sa saindang mga naging katuwang sa rehiyon.
Sa rehiyon, duwa an naging awardees kun saen pigresibe kan Ligao City LGU sa Albay an 2021 National Kabalikat Award mantang binisto an Filminera asin Phil Gold Corporation sa Masbate bilang mga industry partners.
Mantang tinawan onra man an mga indibidwal na nagpahiling nin kakayahan sa Tvet o an mga “TESDA Idols.”
Para sa self-employed category binisto an tubong Masbate na si Neil Anthony Aban na sarong farm school owner mantang nagresibe man nin parehong award si Agnes Fabon na sarong Tvet Teacher para sa wage-employed category.
Obheto kan nasabing mga award na bistuhon an suporta asin kooperasyon kan mga awardees para sa ikakatrayumpo kan implementasyon kan mga serbisyo asin programa kan ahensya.
Tema kan selebrasyon kan ika bente syeteng anibersaryo kan TESDA ngunyan na taon an : Pag bangon, Pag asa at Pag abante sa Bente siete.
