“DAGHANG salamat sa akong mga ka miyembro sa KaBrigadahan kay natupad jud akong ginapangayo na wheelchair para sa akong amahan.”
Kini ang nahimong pamahayag ni Anabelle Palmares, 50-anyos, nga nagpa-fundraise sa KaBrigadahan Gensan arun matabangan iyang amahan nga duha ka tuig nga na-stroke.
Adlawng Sabado, nadawat na gyud niya ang wheelchair alang sa iyang amahan nga si Dominador Narvasa.
“Makagawas na gyud siya, duha ka tuig na gyud na siya nga naa ra sa sulod,” dugang pa niya.
Lain pa sa wheelchair, nagpa-fundraise sad si Palmares para makapalit og nebulizer alang sa iyang asthma.
Gidawat pud ni Virginia Mariquit, 61-anyos, ang wheelchair alang sa iyang bana nga si Herman Mariquit nga anaa sa kasamtangan sa hospital.
Nituktok usab si Mariquit sa malumong kasing-kasing sa mga miyembro sa KaBrigadahan Gensan nga matagaan og wheelchair iyang bana nga naglisod na og barog tungod sa diabetes. “Naa na gyud siya’s kalingkuran, kay gusto to siya mag gawas-gawas, dili na maglubog ra sa sulod sa balay. Salamat kaayo sa KaBrigadahan, labi na sa mga miyembro,” matud ni Mariquit.
