GIPAHIBALO sa taga City Veterinary Office nga walay bag-ong kaso sa African Swine Fever (ASF) sa General Santos City subay sa ilang monitoring samtang nibalik na ug kusog ang palit sa litson sa Calumpang Highway.
Sa paghinabi sa Brigada Gensan kay City Veterinary Officer Dr. Emelio Gargaran gipahibalo niini nga sa milabay nga mga semana wala na silay na monitor nga baboy nga adunay African Swine Fever.
Gidugang ni Gargaran nga ang sa Baluan nga kaso wala nay nadugang bisan sa mga silingan nga mga lugar, tungod niini nagpabilin sa Green Zone ang syudad, nagpasabot nga mamahimo nga maka supply ang Gensan sa ubang dapit buhi man o karne sa baboy.
Sumala sa usa ka negosyante og litson nga si Mario Abraham nakabentaha na sila karon kay kusog na ang ilang litson, daghan na ang naga palit, kon sa una dili sila makapahurot sa usa ka litson, sa karon kaya na nga mapahurot ang duha ka ulo matag adlaw.
Sumala usab sa laing tag-iya ug litsonan nga si Ofelia Labesti ang ilang ginakuhaan ug supply adunay gikan sa backyard unya sa piggery farm, ang presyo nanukad sa P160-170 sa matag kilo.
Ang ilang presyo sa naluto na anaa usab sa P550 matag kilo sa unod,ang tiil P380 ug ang ulo P350 matag kilo.
Kon si Eddie Monticino ang pasultihon lisod kaayo ang ilang sitwasyon sa panahon nga adunay kaso sa ASF kay limitado ang ilang supply bisan sa sulod sa Gensan.
Si Rolly Cano, driver sa fishcar gikan sa Gensan Fishport padulong sa Digos usa sa naabtan sa taga Brigada nga nipalit og litson sa Highway Calumpang, sumala niini nga kapin kilo ang iyang gipalit alang sa iyang pamilya. I Ver Diazon
