Giklaro ni Gobernador Gwendolyn Garcia nga pamutlon lang ang mga kahoy sa lungsod sa Poro, isla sa Camotes kung delikado na ngadto sa mga motorista.
Atol sa ilang meeting kagahapon sa Poro Municipal Hall, mas gihatagan og pagtagad sa habig sa Kapitolyo ang kaluwasan sa mga mo byahe sa dalan pinaagi sa road widening project.
Nag-abot silang Garcia, mga kadagkuan gikan sa contractor nga Gonzalodo Construction and Development Corp., mga opisyal sa LGU-Poro, ug kaparian gikan sa Sto. Niño Parish.
Kini human nga nanawagan ang parish priest nga si Rev. Fr. Joel Bonza nga dili unta pamutlon ang kapin 700 ka mga kahoy aron palapdan pa ang dalan.
Gani, nakahigayon si Bonza og lusad sa ilang online petition nga salbaron unta ang mga karaang kahoy nga maapektuhan sa kapin 13-kilometros nga provincial road diin palapdan pa kini.
Matud ni Garcia nga mosunod lang sila sa mga lagdang gitagana sa maong proyekto sama na lang sa Executive Order Number 180 series of 1948 bahin sa pagpalapad sa dalan.
Samtang gitataw ni Engr. Anjo Gonzalodo sa Gonzaldo Contruction and Development Corp. nga wala silay gipamutol nga kahoy alang sa Poro-Camotes Road Expansion.
Andam hinuon sila nga mosanong sa tanang mga permiso una pamutlon ang mga kahoy kung gikinahanglan. | Gian Navarro