Kasamtangan nga gitanggong sa Liloan Police station alang sa pagpasaka og kaso nga Attempted homicide ang usa ka lalaki nga misuway sa pagdunggab sa duha niya ka paryente didto sa Sitio Tabay Lawom Upper San Vicente Liloan pasado alas 8 kagabie Mayo 23, 2024.
Ang suspetsado giila nga si Darwin Talisic Atis, 45 anyos, molopyo sa samang dapit nakahiagom og mga bun-og ug samad sa kalawasan human gitabangan og kulata dihang dunggabon unta niya ang duha ka paryente sa iyang cutter blade nga matud pa niya kapin na sa 13 ka tuig niyang ginamit.
Ang duha ka gisuwayan sa pagdunggab mao sila Regie Arnaiz 39 anyos ug Saul Mantuhac 35 anyos managsama nga molopyo sa nahisgutang lugar.
Nasayran nga panaglalis lang ang sinugdanan sa maong hitabo tungod sa ilang pustahanay sa volleyball diin nasuko matud pa ang suspect nga wala bayari dayon sa iyang daog hinungdan nga misangpot sa pagdunggab sa suspect ngadto unta sa mga biktima apan nakalihay ang duha.
Giangkun hinuon sa suspetsado nga mawala gyud siya sa maayong panghunahuna kung mahubog siya, apan nangayo siya og pasaylo sa iyang nabuhat.
Posible nga mahusay ra usab ang matag habig sanglit magkadugo ra man ang mga nalambigit niini. | Jonalyn Jumabis