–Daina Gerona
KABANKALAN CITY, Negros Occidental — Nagapabilin sa Corazon Memorial Hospital ang duha ka mga kabata-an ni Eumil Fernandez alyas “Toto”, samtang yara naman sa Tabugon Hospital ang asawa nga si Rubelyn Francisco alyas “Dadang” kag isa pa ka bata, matapos ini ang iya nga ginpanglabo tinalikdan nga gab-e sa Prk. Ibus, Brgy. Tapi, Kabankalan.
Suno sa kay Dadang nga kuhaon na kuntani ni Toto ang iya sini nga ginapabukal nga ininit, apang iya ini nga ginhambalan nga indi lang kag hulat-hulaton pa nga maka-abot ang ila 13 anyos nga bata nga ginsugo sa pagbakal sang noodles para sa panyapon.
Didto kag gulpi lamang nga nagkuha sang binangon si Toto kag una na nga ginpanglabo ang iya sini nga duha ka mga kabata-an. Gintingwa-an naman sa pag-agaw sang asawa apang, ini ang nalab-an man samtang ginabitbit ang isa kag duha ka tuig nga bata.
Sang nakapalagyo na si Dadang kag ang iya nga mga kabata-an, ang tuyo pa ini kuntani nga lagson ni Toto, apang naabtan sang ila 13 anyos nga bata kag ini ang ginlampusan sang singkaw sang karbaw, wala na ini makatindog kag gilayon man nga gingutrab ang tiyan kag naggwa ang iya nga mga tina-e kag gintu-naan sang iya nga kamatayon.
Base sa panalaysayon ni Sepa sa Brigada Kabankalan, nga utod sang suspetsado, yara na sa kapin duha ka tuig nga nagasuprer si Eumil sang nervous breakdown, diin permi ini nagapanirado sang pirtahan sa ila nga puluy-an kag kon may mabati-an nga gahod nagakabatyag sang kahadlok.
Dugang pa, nga naka-agi na sang priso sang lima ka adlaw si Eumil, bangud sa pagpanglabo man sa ila ka nga kaingod balay, apang ini ang nakapyansa kag na-antras ang kaso.*