BNFM BICOL– Kumpleto asin nagagamit na ngunyan kan PNP-Virac sa probinsya nin Catanduanes an nasa 22 na mga high definition cameras na tig bugtak sa mga mayoryang katinampuhan kan banwaan.
Iniyo ang kinumpirma ni Virac, Catanduanes Mayor Sinforoso Sarmiento sa sarong intrebista katakod pa man giraray kan mga proyekto asin programang ipigtutulod kan LGU para ma asegurar an ‘paz y orden’ sa saindang banwaan, urog na kan naibareta an harabunan nin helment asin motor kaning mga nakatalikod na bulan.
An mga nasabing CCTV cameras, pinondohan sa irarom kan Peace and Order and Public Safety Plan kan gobyerno lokal na taon-taon, inaalokaran nin nasa P5-milyones na kantidad nin pondo para masuportaran an PNP sa saindang mga pangangaipo sa pagmantenir nin katuninungan asin kaligtasan kan lambang Viracnon.
May kapasidad suboot ang mga nasabing CCTV na mahiling an plate numbers kan mga lunadan asin maging kan mga traysikel na dakulang bagay in kaso ma imbwelto an mga ini sa aksidente o ano man na pangyayaring mangangaipo nin legal na aksyon.
Marurumduman na kaning nakaaging semana, pormal naman nan a i-turn over kan LGU sa Virac MPS ang nasa 50 unit nin mga body cameras na gagamiton kan kapulisan para sa saindang mga operasyon.
Lain pa digdi an sarong unit nin drone camera; sarong unit nin rifle sniper; mga rechargeable flashlights asin nasa 300 na mga pro baton na ipandidistribwer sa maniba-ibang barangay sa banwaan.###
