GIIMBITAHAN ni Dr. Maria Cristina Ramizo, Presidente sa Community Pediatrics Society of the Philippines ang mga ginikanan nga may mga anak anaa sa edad 5 hangtud 11 anyos nga magpabakuna na batok COVID-19.
Kasamtangan naapil ang GenSan sa mga lugar sa nasud nga nagsugod na sa pagpabakuna sa maong age group ug giuna ang mga dependents sa mga health care workers.
Hangyo usab ni Ramizo sa mga ginikanan nga adunay anak nga may mga sakit sama sa diabetis, obesity, asthma, sakit sa kidney ug uban pa nga mangayo og rekomendasyon sa ilang doctor aron mabakunahan.
Gipaniguro usab niini nga safe and effective ang bakuna alang sa mga bata tungod miagi kini sa clinical trial ug may pagtugot gikan sa gobyerno ug gigamit usab sa daghang nasud.
Dugang ni Ramizo, minilyon na ka mga bata edad 5 anyos hangtud 11 anyos sa tibuok kalibutan ang nabakunahan ug anaa sa 97 percent ang wala nakasinati og side effects apan anaay gamay lang nga 2.4 percent nga nakasinati og hilanat, sakit sa ulo ug pagkaluya apan nawala ra usab gilayun.
Ang dosage sa bakuna sa bata batok COVID-19 ang one third lang sa adult dose ug nasuta usab nga 100 percent nga makatabang aron dili makasinati og grabeng epekto sa virus ang mga bata ugaling matakdan.-
