Gi-awhag sa Department of Education-7 ang mga tunghaan nga likayan una ang pagbuhat og mga gimik atol sa graduation and moving up ceremonies.
Subay kini sa nahimong viral video karon bahin sa graduation ceremony sa usa ka tunghaan sa Davao del Norte diin nanayaw ang mga nakahuman sa senior high human nidawat sa diploma.
Nasayran nga nahitabo ang maong gimik niadtong 2023 apan nahugyaw ug nabalaka ang publiko human kini mikatag online.
Matud ni DEPED-7 Director Dr. Salustiano Jimenez nga gilikayan nila ang bisan unsang aksidente sa isig ka ingon o sa ubang mga gamit maong dili una pwede ang maong matang sa gimik.
Gipahinumduman ni Jimenez ang school heads nga ipabilin ang kasimple ug kasagrado sa graduation ug moving up sa mga tinun-an.
Apan kinahanglan ipabilin ang pagka-memorable sa maong kalihukan.
Labaw sa tanan, mipahinumdom ang regional director nga ginadili ang collection fees aron makagraduate ug dili kini compulsory.
Kung mahimo usab himoong simple lang ang kalihukan ug kalikayan ang hilabihang kagarbo sa seremonyas. | Gian Navarro
