Ginpaidalom ang kapin 3,000 ka mga empleyado sang gobyerno probinsyal sa International Organization for Standardization (ISO) Orientation.
Luyag ni Governor Fredenil Castro nga mapasanyog ang nasambit nga talatapan kag makahatag pa gid sang dekalidad nga serbisyo sa pumuluyo sang Capiz.
Ini nga kahiwatan ang kabahin nga tikang sang Capiz Provincial Government bilang preparasyon agud maangkon ang ISO Certification ukon mangin ISO 9001 Certified.
Ang ISO 9001 ang isa ka quality management system nga gindesinyo agud buligan ang mga organisasyon sa pagtuman sang mga pagsulundan kag mahatag ang nagakaigo nga serbisyo sa pumuluyo, apang agud malab-ot ini, nagakinahanglan man nga ang organisasyon ang mangin madinalag-on sa pag-implementar sang Quality Management System nga na suno sa tanan nga kinahanglanon nga yara sa ISO 9001 standard.
Sa ginhiwat nga oryentasyon kag sa pagpanguna sang mga katapo sang Neo Amca Innovative Solutions Corporation, ginpresentar kag ginpaathag sa linibo ka mga empleyado ang mga nagakadapat nga mahibaluan sang mga ini natuhoy sa ISO 9001.
Nauna na nga ginpaidalom man sa orientation ang mga department heads apang bilang hepe sang ila tagsa ka talatapan, liwat sila nga gintipon kag mas ginpaathag pa gid sang madalom ang International Organization for Standardization.
Sa nahibaluan, nga kon ini ang magamadinalag-on, ang Capiz Provincial Government ang mangin labing una pa lamang nga ISO 9001 Certified sa bug-os nga Western Visayas.
