LEGAZPI CITY – Inalerto ng Securities and Exchange Commission in Bicol (SEC-5) ang publiko laban sa grupo ng mga tao na kumakatawan sa kanilang sarili bilang mga miyembro o konektado sa Universal Tribes International Corporation (UTIC).
Sa isang pahayag sinabi ni Glorei Lindio, tagapagsalita ng SEC-Legazpi Extension Office, na ang babala ay inilabas matapos makatanggap ng impormasyon ang kanilang tanggapan na may grupo ng mga tao na nag-iimbita sa publiko sa iba’t ibang barangay na sumali sa asosasyon na may pangako ng tulong sa hinaharap o mga benepisyo.
Sa mga tala ng SEC, ang UTIC ay isang rehistradong non-stock na korporasyon na may opisina na matatagpuan sa R-5 C Village A, Pook U.P. Campus sa Quezon City.
Diumano, ang grupong nag-aangking kumakatawan sa UTIC ay nagre-recruit ng mga indibidwal na sumali sa kumpanya sa pamamagitan ng pagbabayad ng membership fee na PHP150 at nangangako ng PHP10,000 cash at PHP10,000 na halaga ng mga kalakal at karagdagang PHP1,000 para sa bawat bata sa sambahayan.
Dagdag pa nito, matatanggap ng mga miyembro ang mga benepisyo kung makakaupo na sa pwesto ni President-elect Ferdinand “Bongbong” Marcos, Jr.
Bagama’t ang ulat na natanggap ng SEC-Legazpi ay tumutukoy lamang sa mga aktibidad sa pangangalap na diumano’y nangyayari rin sa Legazpi City, hindi naman binabawasan ang posibilidad na ang mga katulad na iligal at hindi awtorisadong aktibidad, ginagawa man ng pareho o magkaibang grupo, ay maaari ding mangyari sa ibang mga lugar at iba pang mga lalawigan sa rehiyon.
Idinagdag ng SEC-5 na pinaalalahanan ang publiko na i-verify sa kanilang mga opisyal ng lokal na pamahalaan o anumang kinauukulang tanggapan ng gobyerno, kabilang ang SEC, ang pagiging lehitimo ng anumang hindi awtorisadong aktibidad sa recruitment na nangangako ng iba’t ibang benepisyo, kabilang ang mga gumagamit ng pangalan ng mga public figure.
