Gibalhog sa Kapulisan sa Mabolo ang usa ka 18 anyos nga lalaki human kini nangawat og cellphone sa tindahan sa Barangay Banilad ning Dakbayan sa Sugbo.
Positibong nailhan ang maong kawatan nga mao si Raymong Cañoca Ruiz, way trabaho, adunay live-in partner, residente sa Barangay Caretta, ning syudad.
Basi sa imbestigasyon sa Kapulisan sa Mabolo nga ang maong kawatan nadakpan pinaagi sa mga Barangay Tanod sa Barangay Banilad human nga magpakitabang ang biktima nga si RUBY 21 anyos nga gikawat ang iyang cellphone nga Realme C67 nga nakantidad sa 11,000 mil ka pesos.
Samtang sa atong pakighinabi sa maong kawatan nga si RAYMOND CAÑOCA RUIZ, mibutyag kini nga natintal lang siya sa pagpangawat human sila magkasabot sa iyang kauban nga 12 anyos nga bata nga mangawat sila.
Matud pa ni Ruiz nga atol sa ilang pagpangawat ang 12 anyos nga bata ang mitunol sa maong cellphone ug dali dayun silang misibat apan pakyas sila sa ilang gibuhat nga pagpangawat kay naapsan sila sa mga Barangay Tanod nga silang Mancao ug Bicbic.
Sigon pa ni Ruiz nga nabuhat lang niya kini alang sa ilang pangsustento tungod kay 7 na siya kabuwan nga nangita og trabaho apan pakyas siya makatrabaho kay grade 2 lang siya kutob.
Ingon man duna siyay sideline apan tig file lang siyag hollowblock sa sementeryo sa Caretta apan dili kini kanunay nga duna siyay makwarta niini.
Gipadayag sab ni Ruiz nga dako ang iyang pagpamahay nga nabuhat niya ang maong krimen tungod kay mao kini ang rason nganong nabalik nasab siya sa prisohan, kay matud pa niya nga napriso na siya kaniadto apan dili sa kaso sa pagpangawat apan kaso sa pagkalambigit sa illegal nga swertres.
Kasamtangan nga gibalhog na si Ruiz sa Mabolo Police Station ug napahibaw na niya ang iyang pamilya nga napriso siya sa pagkakarun ug matud niya nangita na sila ug pamaagi nga makapyansa siya sa kasong pagpangawat.//
